သူရိယအလင်းဂျာနယ် ရေးသားဖော်ပြချက် မြန်မာဂျာနယ်လစ် ကွန်ရက် ကန့်ကွက်

By ADMINISTRATOR - Fri Nov 01, 3:13 pm

ရန်ကုန်၊ အောက်တိုဘာ ၃၁

စာနယ်ဇင်းကျင့်ဝတ်နှင့် မကိုက်ညီဘဲ ပုဂ္ဂိုလ်ရေးဆန်ဆန် ရေးသား တိုက်ခိုက်မှုများကို ဖော်ပြခဲ့သည့် သူရိယအလင်း ဂျာနယ်ကို မြန်မာဂျာနယ်လစ် ကွန်ရက်က ကန့်ကွက်ကြောင်း အောက်တိုဘာ ၃၁ ရက်နေ့ ရက်စွဲဖြင့် ကြေညာချက် ထုတ်ပြန်ခဲ့သည်။

လွတ်လပ်စွာ ထုတ်ဖော် ပြောဆိုခွင့်၊ သတင်းလွတ်လပ်ခွင့်များကို တန်ဖိုးထား ကာကွယ်ရန် လူငယ်သတင်းစာသမား အများစုဖြင့် ဖွဲ့စည်းထားသော မြန်မာဂျာနယ်လစ် ကွန်ရက်၏ ထုတ်ပြန်ချက်တွင် သတင်းမီဒီယာသမားများ လိုက်နာရန် မြန်မာနိုင်ငံ စာနယ်ဇင်းကောင်စီ (ယာယီ) က ထုတ်ပြန်ထားသော စာနယ်ဇင်းကျင့်ဝတ်နှင့် ကိုက်ညီခြင်းမရှိဘဲ မြန်မာ့ သတင်းမီဒီယာလောက၏ ဂုဏ်သိက္ခာကို ထိခိုက်စေနိုင်သည့် ဖော်ပြမှုများ ပါရှိနေကြောင်း၊ သတင်းမီဒီယာ အဖွဲ့အစည်းများနှင့် သတင်းမီဒီယာ လောကသားများ စုပေါင်းကာ လွတ်လပ်သော သတင်းမီဒီယာ ဥပဒေများ ပေါ်ထွက်ရန် ကြိုးစားနေချိန်၊ သတင်းမီဒီယာလောကကို မည်သည့်အာဏာပိုင် အဖွဲ့အစည်းကမျှ လာရောက် ထိန်းချုပ်ခြင်းကို လက်မခံဘဲ မိမိတို့ကိုယ်တိုင် ကြီးကြပ် ထိန်းသိမ်းကြရန် ပြောဆိုနေချိန်တွင် ထိုသို့သော ကျင့်ဝတ်နှင့် မကိုက်ညီသည့် ဖော်ပြမှုများကြောင့် သတင်းမီဒီယာ လောကကို ထိန်းချုပ်ရန် လိုအပ်သည်ဆိုသည့် အယူအဆများကို ပေါ်ထွန်း လာစေနိုင်ကြောင်း၊ ထိုသို့သော ရေးသားမှုများကြောင့် သတင်းမီဒီယာ လောကအပေါ် လူအများ၏ ယုံကြည် ကိုးစားမှုလည်း လျော့နည်း ကျဆင်းလာစေနိုင်ကြောင်း ပါရှိသည်။

သူရိအလင်းဂျာနယ်တွင် အယ်ဒီတာများ ကန့်ကွက်သည့်ကြားမှ ပုဂ္ဂိုလ်ရေး ထိပါးသည့် ဆောင်းပါးများကို စီအီးအိုဖြစ်သူ ဦးမိုးဟိန်းက ၎င်းတစ်ဦးတည်း သဘောထားဖြင့် ထည့်သွင်း ဖော်ပြခဲ့မှုကို ကန့်ကွက်ကြောင်း သဘောထား ထုတ်ပြန်ချက်ကို ထုတ်ဝေသူ ဦးယုနိုင်နှင့် အယ်ဒီတာ အဖွဲ့က နိုင်ငံပိုင် သတင်းစာတွင် အောက်တိုဘာလ ၂၁ ရက်က ဖော်ပြခဲ့သည်။

မြန်မာဂျာနယ်လစ် ကွန်ရက်၏ ထုတ်ပြန်ချက်နှင့် ပတ်သက်၍ သူရိယအလင်း ဂျာနယ်တွင် အမှုဆောင် အရာရှိချုပ်အဖြစ် ဆောင်ရွက်ခဲ့သူ ဦးမိုးဟိန်းကို ဆက်သွယ်မေးမြန်းရာ“စာနယ်ဇင်းကျင့်ဝတ်လို့ ဆိုရအောင် ကျွန်တော်တို့က အမေရိကန်တို့လို နိုင်ငံကို ပြန်ကြည့်ရမယ်။ နယူးယောက် တိုင်းမ်၊ ဝါရှင်တန်ပို့စ်စတဲ့ သတင်းမီဒီယာတွေက ဘယ်သူတွေကိုမဆို မကြောက်မရွံ့ ဖော်ပြနေတာပဲ။ အခုလို ပြည်သူတွေဘက်က ရပ်တည် ဖော်ပြပေးနေတဲ့ သူရိယအလင်း၊ သူရိယနေဝန်းပါ ရေးသား ဖော်ပြချက်တွေဟာ ဘာမှမပြောပလောက်ဘူး။ မြန်မာနိုင်ငံက စာနယ်ဇင်း လွတ်လပ်ခွင့်ထက် ကမ္ဘာ့ စာနယ်ဇင်း လွတ်လပ်ခွင့်ကို ကြည့်ပြီး ထုတ်ပြန်သင့်တယ်။ အခုထုတ်ပြန်ချက်ဟာ လုံးဝအဓိပ္ပာယ် မရှိဘူး” ဟု တုံ့ပြန် ပြောကြားသည်။

သူရိယအလင်း ဂျာနယ်ကို ထုတ်ဝေခဲ့သည်မှာ နှစ်လခွဲခန့် ကြာမြင့်ခဲ့ပြီး စောင်ရေအားဖြင့် ၁၂ စောင်အထိ ထုတ်ဝေပြီးနောက် ၎င်းဂျာနယ်၏ အမှုဆောင် အရာရှိချုပ်ဖြစ်သူ ဦးမိုးဟိန်းက ထုတ်ဝေသူ ဦးယုနိုင်နှင့် သဘောထားကွဲလွဲကာ အောက်တိုဘာ ၂၀ ရက်နေ့က နိုင်ငံပိုင်သတင်းစာတွင် အတိအလင်း ကြော်ငြာကာ ရပ်ဆိုင်းလိုက်ခြင်း ဖြစ်သည်။

သူရိယအလင်း ဂျာနယ် ထုတ်ဝေခြင်းကို ရပ်ဆိုင်းလိုက်ရာ ၎င်းဂျာနယ်တွင် လုပ်ကိုင်သော ဝန်ထမ်း၂၅ ဦးကို လုပ်ငန်း ရပ်ဆိုင်းသည့်အတွက် နစ်နာကြေးအဖြစ် လုပ်ခလစာကို ပေးအပ်လိုက်ပြီ ဖြစ်ကြောင်း အဆိုပါဂျာနယ် ထုတ်ဝေသူ တစ်ဦးဖြစ်သူ ဦးခင်အေးက ပြောကြားသည်။
“သူတို့ ရသင့်ရထိုက်တာကို အလုပ်သမားဝန်ကြီးဌာနက သတ်မှတ်ပေးတဲ့အတိုင်း ပေးရတာပါပဲ။ အလုပ်သမားတွေနဲ့ ဘာပြဿနာမှ မရှိပါဘူး” ဟု ၎င်းက ဆက်လက်ပြောကြားသည်။
နစ်နာကြေးကို သုံးလစာ တောင်းခံထားသော်လည်း တစ်လစာသာ ရရှိခြင်း ဖြစ်ကြောင်း အဆိုပါဂျာနယ်၏ ဝန်ထမ်းတစ်ဦးက ဆိုသည်။

အဆိုပါ သူရိယအလင်း ဂျာနယ်ကို ရပ်ဆိုင်းလိုက်ရပြီးနောက် သူရိယနေဝန်း အမည်ဖြင့် ဆက်လက်ထုတ်ဝေမည် ဖြစ်ကြောင်း ဦးမိုးဟိန်းက ပြောဆိုသော်လည်း ဝန်ထမ်းများမှာ ဆက်လက် လုပ်ကိုင်လိုကြခြင်း မရှိသဖြင့် နစ်နာကြေး တောင်းခံကာ အလုပ်မှ ထွက်လိုက်ကြခြင်း ဖြစ်ကြောင်း သူရိယအလင်း အယ်ဒီတာ အဖွဲ့ဝင်တစ်ဦးက ဆိုသည်။