Home » ပြည်တွင်းရေး » AGD ဘဏ် ငွေအပ်ထားသူများ အလုံးအရင်းနှင့် ပြန်ထုတ်ယူသည် ဆိုခြင်းမှာ ကောလဟလဟုဆို
AGD ဘဏ် ငွေအပ်ထားသူများ အလုံးအရင်းနှင့် ပြန်ထုတ်ယူသည် ဆိုခြင်းမှာ ကောလဟလဟုဆို
Written By Aye Chan Mon on Thursday, November 21, 2013 | 2:55 PM
ရန်ကုန်၊ နိုဝင်ဘာ ၂၀
သယံဇာတ ထုတ်ယူခြင်း အပါအဝင် မြန်မာနိုင်ငံ၏ အဓိက စီးပွားရေး လုပ်ငန်းများ လုပ်ကိုင်ခွင့် ရရှိထားသော ဦးတေဇ ပိုင်ဆိုင်သည့် အာရှ စိမ်းလန်းမှု ဖွံ့ဖြိုးရေးဘဏ် (AGD) နေပြည်တော် ဘဏ်ခွဲ တွင် ငွေအပ်နှံသူများက ငွေများ အလုအယက်ဖြင့် အလုံးအရင်း ပြန်လည် ထုတ်ယူနေကြသည်ဟု အင်တာနက် စာမျက်နှာ အချို့တွင် ပျံ့နှံ့နေသော သတင်းများမှာ ကောလာဟလများသာ ဖြစ်ကြောင်း အဆိုပါဘဏ် အုပ်ချုပ်မှု ဒါရိုက်တာ ဦးရဲမင်းဦးက ငြင်းဆို ပြောကြားသည်။
အဆိုပါ သတင်းမှာ တရားဝင် မီဒီယာများ၏ အင်တာနက် စာမျက်နှာများမှ ထွက်ပေါ်လာသည့် သတင်းမဟုတ်ဘဲ အွန်လိုင်း စာမျက်နှာများမှ ကောလာဟလများ ဖြန့်ခြင်းသာ ဖြစ်ပြီး AGD ဘဏ် နေပြည်တော် ဘဏ်ခွဲမှာ လူသုံးနည်းသော ဘဏ်ဖြစ်၍ လာရောက် ထုတ်ယူသူ အများအပြား မရှိကြောင်း ၎င်းက တုံ့ပြန် ပြောဆိုသည်။
“ဘဏ်နာမည်ကို သက်သက် ယူသုံးပြီး ဖွတာပါ။ ကျွန်တော်တို့ ဘဏ်ကလည်း ဘယ် ဗိုလ်ချုပ်မှူးကြီးမှ မပိုင်ပါဘူး” ဟု ၎င်းကဆိုသည်။
ဗိုလ်ချုပ်မှူးကြီးဟောင်း သန်းရွှေက သူ၏ ရှယ်ယာများ ပြန်ထုတ် သွားပြီဆိုသော သတင်းကြောင့် နေပြည်တော် AGD ဘဏ်တွင် ငွေအပ်ထားသူများ အလုအယက် ငွေများ ပြန်ထုတ်နေကြကြောင်း လူမှုကွန်ရက် စာမျက်နှာများတွင် သတင်းများ ပျံ့နှံ့လျက် ရှိသည်။
ယင်းကဲ့သို့ ကောလာဟလများ ထွက်ပေါ်၍ ဘဏ်များမှ ငွေထုတ်ယူသူများ လာပါက ပြင်ပတွင် ကုန်ဈေးနှုန်း တက်သွားမည် ဖြစ်ကြောင်း၊ ယင်းကြောင့် ကုန်ဈေးနှုန်း တက်စေရန် ရည်ရွယ်၍ သတင်းဖြန့်ခြင်း ဖြစ်နိုင်ပြီး အခြားဘဏ် တစ်ခုက (တိုက်ခိုက်သည့်သဘော) လုပ်ဆောင်ခြင်း မဖြစ်နိုင် ကြောင်း ကမ္ဘောဇဘဏ် ဒုတိယဥက္ကဋ္ဌ ဦးသန်းလွင်က မှတ်ချက်ပြု ပြောကြားသည်။
“ကုန်ဈေးနှုန်း တက်စေချင်တဲ့ သူတွေက သတင်းလွှင့်တာပဲ။ ဘဏ်အပ်ငွေတွေ ထုတ်ရင် အပြင်မှာ ကုန်ဈေးနှုန်းတွေ တက်ကုန်တယ်။ ဘာကြောင့်လဲဆိုတာ ဘဏ်တစ်ခုမှာ ငွေထုတ်ရင် အခြားဘဏ် တွေမှာ လိုက်ထုတ်တာမျိုးက ဖြစ်ကို ဖြစ်တယ်။ ဒါမျိုးက ရောဂါ လိုက်တတ်တယ်” ဟု ၎င်းကဆိုသည်။
ပုဂ္ဂလိက ဘဏ်များသည် ဘဏ်အပ်ငွေများ အားလုံးကို ဗဟိုဘဏ်တွင် ထားရှိသောကြောင့် ငွေအပ်နှံ ထားသူများ စိုးရိမ်ရန် မလိုကြောင်း ဦးသန်းလွင်က ထပ်လောင်း ပြောကြားသည်။
၂၀၁၂ ခုနှစ် အောက်တိုဘာလကလည်း ကမ္ဘောဇဘဏ် ဥက္ကဋ္ဌ ဦးအောင်ကိုဝင်း စစ်ဆေးမေးမြန်း ခံရသည်ဟု ကောလာဟလများ ထွက်ပေါ်ခဲ့ပြီး အဆိုပါဘဏ်တွင် ငွေအပ်နှံသူများ တန်းစီ ငွေထုတ်ယူမှု ဖြစ်ပွားခဲ့သည်။
KIA ဒုတိယစစ်ဦးစီးချုပ် ဗိုလ်ချုပ် ဂွမ်မော် ရန်ကုန်မြို့သို့ လာရောက်စဉ် ဦးတေဇနှင့် တွေ့ဆုံခဲ့ကြောင်း သတင်းများ ထွက်ပေါ်ခဲ့ပြီး နောက်တစ်နေ့ တွင် ယခုကဲ့သို့ ကောလာဟလများ ထွက်ပေါ်ခဲ့ခြင်း ဖြစ်သည်။
No comments:
Post a Comment