မီနီဆလွန်း ၃၀၀ ကျော် စက်မှုဝန်ကြီးဌာန ထပ်ထုတ်မည်

By ADMINISTRATOR - Wed Oct 30, 7:28 pm

ရန်ကုန်၊ အောက်တိုဘာ ၂၉

ဌာနဆိုင်ရာ အရာထမ်းများကို အရစ်ကျစနစ်ဖြင့် မြန်မာမီနီဆလွန်း စီးရေ ၄၀၀ ကျော် ရောင်းချပေးခဲ့သော စက်မှုဝန်ကြီးဌာန အမှတ် (၁) အကြီးစား စက်မှုလုပ်ငန်းက ထပ်မံ၍ 1000 CC အောက် မီနီဆလွန်း အစီး ၃၀၀ ကျော်ခန့် ထပ်မံ ထုတ်လုပ်သွားမည်ဖြစ်ကြောင်း အဆိုပါ လုပ်ငန်း၏ ဦးဆောင်ညွှန်ကြားရေးမှူး ဦးအေးသောင်းက ပြောကြားသည်။

မီနီဆလွန်းများ ထုတ်လုပ်နိုင်ရန် ပုဂ္ဂလိကပိုင် ကုမ္ပဏီများနှင့် အကျိုးတူ ပူးပေါင်းသွားမည်ဖြစ်၍ ကုမ္ပဏီများက ထုတ်လုပ်လိုသည့် မည်သည့်နိုင်ငံထုတ် မီနီဆလွန်းယာဉ် အမျိုးအစားမဆို အသေးစိတ် အချက်အလက်များဖြင့် နိုဝင်ဘာလ ၈ ရက်နေ့ နောက်ဆုံး လာရောက် ဆွေးနွေးနိုင်ကြောင်း အမှတ် (၁) အကြီးစားစက်မှုလုပ်ငန်း၏ ထုတ်ပြန်ချက် အရ သိရသည်။
ထပ်မံထုတ်လုပ်သော မီနီဆလွန်း များကို ၂ နှစ်အရစ်ကျဖြင့် တစ်စီးလျှင် ကျပ်သိန်း ၁၀၀ အောက်ဖြင့် ဆက်လက် ရောင်းချပေးသွားမည် ဖြစ်ကြောင်း အမှတ် (၁) အကြီးစားစက်မှုလုပ်ငန်း ဦးဆောင် ညွှန်ကြားရေးမှူး ဦးအေးသောင်းက ဆိုသည်။

“ဒီကားတွေက ဝန်ထမ်းတွေကို အဓိက ရောင်းပေးတာပါ။ အပြင်လူတွေလည်း ဝယ်ချင်ရင် ဝယ်နိုင်ပါ တယ်။ ဒါပေမဲ့ အရစ်ကျတော့ မရောင်းပေးပါဘူး။ နိုင်ငံတော်က ဝန်ထမ်းတွေ ဈေးနှုန်းသက်သာစွာ ကားစီး နိုင်စေဖို့ ရည်ရွယ်ပြီး ထုတ်လုပ်ပေးတာပါ” ဟု ၄င်းက ဆိုသည်။

မြန်မာ မီနီဆလွန်းကားများကို ပထမအကြိမ် စက်တင်ဘာလ ၉ ရက်နေ့တွင် စတင်ရောင်းချပေး ခဲ့ခြင်းဖြစ်ပြီး ဒုတိယ အကြိမ်မြောက်ထပ်မံ ရောင်းချပေးနိုင်ရန် စီစဉ်ခြင်းဖြစ်ကြောင်း အဆိုပါလုပ်ငန်းမှ တာဝန်ရှိသူတစ်ဦးက ပြောကြားသည်။

မီနီဆလွန်းများ ထုတ်လုပ်သော်လည်း ပြည်တွင်း မော်တော်ယာဉ် ဈေးကွက်အတွင်း မဝင်ခြင်းကြောင့် ပြင်ပမော်တော် ယာဉ်ဈေးကွက်ကို မထိခိုက်ကြောင်း မင်းရဲကျော်စွာ ယာဉ်ရောင်းဝယ်ရေး စခန်းမှ ကားဝယ်ရောင်း ဦးအေးကျော်က ပြောကြားသည်။
“အရင်ထဲက မြန်မာမီနီဆလွန်းတွေက မြန်မာလူမျိုးတွေ မကြိုက်တဲ့ တရုတ်ကားတွေ ဖြစ်နေတယ်။ ပြီးတော့ အဆင့်နိမ့်တဲ့ ကားလို့တောင် ပြောလို့ရတဲ့အတွက် ဝယ်စီးတဲ့သူ ရှားပါတယ်။ အခုက ဂျပန်ကားတွေပဲ အများစုစီးကြတယ်” ဟု ၄င်းက ဆိုသည်။

ပထမအကြိမ် မီနီဆလွန်းကား ၄၀၈ စီးအား ရောင်းချပေးခဲ့ခြင်းမှာ ပထမ ဦးစားပေး ငွေကျပ်သိန်း ၆၀ လက်ငင်းချေခြင်း၊ ဒုတိယဦးစားပေး ကြိုတင်ငွေ ၁၀ သိန်းပေး၍ ကျန်သိန်း ၅၀ ကို တစ်လလျှင် နှစ်သိန်းခွဲနှုန်းဖြင့် လ ၂၀ ကြာ ပေးသွင်းဝယ်ယူခြင်းနှင့် ကျန်ရှိကားများကို တစ်လလျှင် နှစ်သိန်းခွဲကို ၂၄ လကြာပေး သွင်းဝယ်ယူခြင်း တို့ဖြင့် ရောင်းချပေးခဲ့ခြင်း ဖြစ်ပြီး ဒုတိယ ဦးစားပေးစနစ်ဖြင့် ဝယ်ယူသူ ပိုမိုများပြားခဲ့ကြောင်း အဆိုပါ စက်မှုဝန်ကြီး ဌာနထံမှ သိရသည်။

မြန်မာမီနီဆလွန်းများကို ၂၀၁၁-၂၀၁၂ ဘဏ္ဍာနှစ်မှစတင်၍ တရုတ်နိုင်ငံ အခြေစိုက် ချယ်ရီ ကားထုတ်လုပ်ရေး ကုမ္ပဏီမှ ပစ္စည်းများ တင်သွင်းကာ ထုတ်လုပ်ခဲ့ခြင်း ဖြစ်ပြီး စီးရေ ၂၀၀၀ ကျော် ထုတ်လုပ်ပြီးစီးပြီ ဖြစ်ကြောင်း စက်မှုဝန်ကြီးဌာန၏ ထုတ်ပြန်ချက်အရ သိရသည်။