မြန်မာနိုင်ငံနှင့် အားကစား ပြိုင်ဝင်းကြီးများ (၁)
နေပြည်တော်ရှိ ဝဏသိဒ္ဓိ အားကစား ပြိုင်ကွင်းသစ်ကြီး (ဓာတ်ပုံ – ဧရာဝတီ)
အိုလံပစ် အားကစားပြိုင်ပွဲ ကျင်းပသည့် အားကစား ပြိုင်ဝင်းဟု ဆိုသော်လည်း ထည်ထည်ဝါ၀ါ ခမ်းခမ်းနားနား မရှိလှပါ။ ပြောရလျှင် မြန်မာနိုင်ငံတွင် ရှိသည့် အားကစား ပြိုင်ဝင်းထက် အနည်းငယ်သာ သာဟန်ရှိသည်။ ယင်း အားကစားပြိုင်ဝင်းကို ယခု ၂၀၁၃ ခုနှစ်တွင် ရုပ်မြင်သံကြားမှ တဆင့် ကြည့်ရသောအခါ အထူး အံ့သြသွားမိသည်။ ကြီးကျယ်ခမ်းနားစွာ ပြင်ဆင်ထားသောကြောင့် မဟုတ်ပါ။ ၁၉၆၂ ခုနှစ်တွင် ရှိခဲ့သည့် အတိုင်း၊ အထူးသဖြင့် ပွဲကြည့်စင်များမှာ မပြောင်းလဲပါ။ ၁၉၅၂ ခုနှစ် ကမ္ဘာ့အိုလံပစ် အားစားပွဲတော် ကျင်းပစဉ်က အတိုင်းပင် ဖြစ်သည်။
၁၉၅၂ ခုနှစ် ဖင်လန် အိုလံပစ် မှတ်တမ်းစာအုပ် စာရေးသူထံတွင် ရှိသည်။ ၁၉၅၂ ခုနှစ်နှင့် ၁၉၆၂ ခုနှစ်နှင့် ၂၀၁၃ ခုနှစ်အထိ ဟဲလ်စင်ကီး အိုလံပစ် ကျင်းပရာ အားကစားပြိုင်ဝင်းကို ရှေးမူမပျက် ဆက်လက်ထိန်းသိမ်းကြသည်ကို တွေ့ရခြင်းပင် ဖြစ်သည်။ ယင်း ၁၉၆၂ ခုနှစ်ထဲမှာပင် တရုတ်ပြည် ပီကင်းမြို့တွင် ထိုစဉ်က အကောင်းဆုံးဖြစ်သည့် အလုပ်သမား အားကစားပြိုင်ဝင်း၊ မော်စကိုရှိ လီနင်အားကစား ပြိုင်ဝင်းများကိုလည်း ကြည့်ရှုခဲ့ဖူးသည်။ ၁၉၇၀ ပြည့်နှစ်တွင် ထိုင်းအမျိုးသား အားကစား ပြိုင်ဝင်း၊ ၂၀၀၀ ပြည့်နှစ်တွင် ဇင်းမယ်မြို့တည် နန်းတည် နှစ် ၇၀၀ ပြည့်နှစ် အထိမ်းအမှတ် အားကစားပြိုင်ဝင်း၊ ဘန်ကောက်မြို့တွင် အသစ်ဆောက်လုပ်သည့် “ရာဇမင်္ဂလာ” အားကစားပြိုင်ဝင်း၊ ၂၀၁၁ ခုနှစ်တွင် အင်ဒိုနီးရှား နိုင်ငံ ဂျာကာတာမြို့ရှိ နောင်တော်ကြီး အားကစားဝင်း၊ လီပါးစ်ပူးလ် အားကစား ပြိုင်ဝင်းများကို ရောက်ရှိခဲ့ဖူးသည်။
အင်ဒိုနီးရှား နိုင်ငံ ဂျာကာတာမြို့တော်ရှိ နောင်တော်ကြီး အားကစားပြိုင်ဝင်းမှာ မြန်မာနိုင်ငံနှင့် ပတ်သက်ခဲ့သည့် ရာဇ၀င် ရှိသည်။ ၁၉၅၀ ပြည့်နှစ်ကျော်ခန့်က ဖြစ်သည်။ ဆိုဗီယက် ပြည်ထောင်စုက မြန်မာနိုင်ငံကို လက်ဆောင် လေးခု ပေးခဲ့သည်။ တောင်ကြီး စ၀်စံထွန်းဆေးရုံ၊ ရန်ကုန်စက်မှု တက္ကသိုလ် (RIT)၊ အင်းလျားကန် ဟိုတယ်နှင့် အားကစားပြိုင်ဝင်းကြီး တခုဖြစ်သည်။ တက္ကသိုလ်နှင့် ဟိုတယ်တို့ အကောင်အထည် ပေါ်လာသည်။ အားကစားပြိုင်ဝင်းက အကောင်အထည် ပေါ်မလာပါ။ အကြောင်းရင်းကတော့ အားကစားရွာ (Sports Complex) အဖြစ် တည်ဆောက်ရန် မြေနေရာလွတ် ရှာမရခဲ့ပါ။
မြို့မကျောင်းရှေ့ မြင်းပြိုင်ကွင်းဟောင်း နေရာတွင် အားကစားပြိုင်ဝင်း တခု တည်ဆောက်ရန် ဖြစ်ပါသည်။ မြို့မကျောင်း (ယခု ဒဂုံ အထက ၂) ရှေ့ မြင်းပြိုင်ကွင်းဟောင်းမှာ မြန်မာနိုင်ငံတွင် ဘောလုံး ပြိုင်ပွဲ စတင်ကျင်းပသည့် ဘောလုံး သမိုင်း အစဉ်အလာ ရှိသည့် နေရာဖြစ်သည်။ သို့သော် ဆောက်လုပ်ခွင့် မရခဲ့ပါ။
Sports Complex ဆောက်လုပ်ရန်အတွက် မင်္ဂလာတောင်ညွန့် ရပ်ကွက်အတွင်းရှိ သိမ်ဖြူကွင်း အပါအ၀င် ဒီဘီလိုင်း (နိုင်ငံခြားသား အ၀တ်လျှော်သူများ နေထိုင်ရာ) ကို အားကစားရွာကြီး တည်ဆောက်ဖြစ်ပါက အာရှတိုက်တွင် သာမက ကမ္ဘာ့အကြီးဆုံး Sports Complex များထဲတွင် တခု အပါအ၀င် ဖြစ်လာမည် ဖြစ်သည်။ အဓိက တည်ဆောက်မည့် အဆောက်အဦး မှာ ပွဲကြည့် ပရိသတ် ၈ သောင်း ဆန့်မည့် အားကစားပြိုင်ဝင်းကြီး တခု ဖြစ်သည်။ မြန်မာ့နည်း မြန်မာ့ဟန်ဖြင့် ကြည့်မည် ဆိုလျှင် ပရိသတ် ၁ သိန်းခန့် ကြည့်နိုင်မည် ဖြစ်သည်။
ထိုခေတ် ထိုအခါက ကမ္ဘာပေါ်တွင် ပရိသတ် သိန်းကျော် ကြည့်နိုင်မည့် အားကစားကွင်း ဆိုဗီယက်နိုင်ငံမှာ လီနင် အားကစားကွင်းနှင့် ဘရာဇီးနိုင်ငံမှ အားကစားကွင်းတို့ ဖြစ်သည်။
ယင်း အားကစားပြိုင်ဝင်းကြီးသာ မက အားကစားပြိုင်ဝင်း ပွဲကြည့်စင် အောက်တွင် နေပူမရှောင်၊ မိုးရွာမရှောင် တနှစ်ပတ်လုံး လေ့ကျင့်နိုင်မည့် လေ့ကျင့်ရေးရုံ၊ လေ့ကျင့်မည့် နေရာများလည်း ပါဝင်မည် ဖြစ်သည်။ တဖန် လူ ၁ သောင်း ဆံ့မည့် စက်ဘီးပြိုင်ကွင်း “Velodrom” တကွင်း၊ ရေကူးကန်ပြိုင်ပွဲဝင် မီတာ ၅၀ ရှိကန်၊ ရေကူးသင်စကလေးများအတွက် ရေကန် စသဖြင့် ပါဝင်မည် ဖြစ်သည်။
သို့သော် တိုက်နယ် ဖဆပလ ခေါင်းဆောင်များက ကန့်ကွက်ပါသည်။ သူတို့သည် လက်ျာအုပ်စု ဖြစ်သည်။ ကွန်မြူနစ်ဝါဒကို ဆန့်ကျင်ကြသူများ ဖြစ်သည်။ ထိုစဉ်က ကမ္ဘာနီ၏ ခေါင်းဆောင် ဆိုဗီယက် ပြည်ထောင်စုက ပေးသည့် လက်ဆောင်ကို မယူလိုဟု ဆိုကာ ကန့်ကွက်ခြင်း ဖြစ်သည်။ မြန်မာတိုင်းရင်းသား မဟုတ်သည့် အ၀တ်လျှော်သူများ အတွက်ဟု ဆိုကာ ငြင်းဆန် ကန့်ကွက်ကြခြင်း ဖြစ်သည်။ နောက်ဆုံးရလဒ်ကတော့ မြန်မာနိုင်ငံမှ ရရှိရမည့် အားကစား ပြိုင်ဝင်းကြီးကို အင်ဒိုနီးရှား နိုင်ငံက လက်ခံရယူခဲ့ကြခြင်း ဖြစ်သည်။
အောင်ဆန်း အားကစား ပြိုင်ဝင်းမှာ ကျွန်ခေတ်မှ ရခဲ့သည့် အမွေပင် ဖြစ်သည်။ ထိုစဉ်က BAA ကွင်းဟု ခေါ်တွင်ကြသည်။ ဘီအေအေ ကွင်းကို လွတ်လပ်ရေး ရရှိပြီး ၁၉၅၃ ခုနှစ်ကျမှ အောင်ဆန်းအားကစား ပြိုင်ဝင်းဟု တရားဝင် အမည်မှည့်ခေါ်ခဲ့ သည်။ ၁၉၅၃ ခုနှစ် တိုင်းနှင့် ပြည်နယ် ဘောလုံးပြိုင်ပွဲ နောက်ဆုံးဗိုလ်လုပွဲ အဖြစ် တနင်္သာရီတိုင်းနှင့် ကရင်ပြည်နယ် အသင်းတို့ မကစားမီ နိုင်ငံတော် သမ္မတကြီး ကိုယ်တိုင်က ဘီအေအေကွင်းမှ အောင်ဆန်း အားကစားပြိုင်ဝင်းဟု ပြောင်းလဲ မှည့်ခေါ်လိုက်သည် ဟု ကြေညာခဲ့သည်။ ၁၉၅၃ ခုနှစ် အောက်တိုဘာ ၁၇ ရက် စနေနေ့ညနေ ၄ နာရီနှင့် ၁၁ မိနစ်တွင် အောင်ဆန်းအားကစား ပြိုင်ဝင်း မွေးဖွား သန့်စင်လာခဲ့ရခြင်း ဖြစ်သည်။ လာမည့် ၂၀၁၃ ခုနှစ် အောက်တိုဘာ ၁၇ ရက်နေ့တွင် အောင်ဆန်းကွင်း အနှစ် ၆၀ ပြည့်ပေတော့မည်။
မန္တလေးမှ ဗထူးအားကစား ပြိုင်ဝင်းမှာလည်း အင်္ဂလိပ် လက်ထက်မှပင် စတင်ခဲ့သည်။ “UBBA” အမည်ဖြင့် ဖြစ်သည်။ လွတ်လပ်ရေး ကာလအတွင်းမှာပင် ယူဘီဘီအေ ဘောလုံးကွင်းကို ဗိုလ်မှူးဗထူးအား ဂုဏ်ပြုသောအားဖြင့် ဗထူးကွင်းဟု အမည်ပြောင်းလဲခဲ့ခြင်း ဖြစ်သည်။ မန္တလေးတွင် နိုင်ငံတကာ အဆင့်မီ အားကစားပြိုင်ဝင်းကို ၂၀၁၃ ဆီးဂိမ်းကျမှ စတင်တည်ဆောက် နိုင်သည်။ ယခင်က ဗထူးကွင်းဖြင့်သာ ဘောလုံးလှုပ်ရှားမှုများ လုပ်ဆောင်ခဲ့ကြသည်။
ရန်ကုန်မြို့တော်တွင် အောင်ဆန်း အားကစား ပြိုင်ဝင်း တခုတည်းဖြင့် ၁၉၆၁ နှင့် ၁၉၆၉ ခုနှစ် ကျွန်းဆွယ် အားကစား ပြိုင်ပွဲ ၂ ပွဲ ကျင်းပခဲ့သည်။ ကျွန်းဆွယ် ပွဲများကြောင့် အောင်ဆန်း အားကစားပြိုင်ဝင်းကို ပြုပြင်ပြောင်းလဲ ဆောက်လုပ်မှုများ ရှိခဲ့သည်။
ယခု သုဝဏ္ဏကွင်းဟု လူသိများနေသော အားကစားပြိုင်ဝင်းမှာ ၁၉၈၀ ပြည့်လွန် နှစ်များ အတွင်း ဂျပန်အစိုးရက ဆောက်လုပ် လှူဒါန်းခြင်း ဖြစ်သည်။ မူလအမည်မှာ “လူငယ်များ လေ့ကျင့်ရေး ဗဟိုဌာန” (Youth Training Centre) ဟူ၍ ဖြစ်သည်။ လူငယ်များ အားကစား လေ့ကျင့်ရန် တည်ဆောက်ပေးထားသော အားကစားပြိုင်ဝင်းဖြစ်သည်။ ကာလ ရွေ့လျား လာသောအခါ လေ့ကျင့်ရေးကွင်းမှ နိုင်ငံတကာ ဘောလုံးပွဲများ အထိ လက်ခံကျင်းပ လက်ခံကျင်းပသည့် အားကစား ပြိုင်ဝင်း အထိသို့ ပြောင်လဲ လာတော့သည်။
၂၀၁၃ ခုနှစ် အရှေ့တောင် အာရှ အားကစား ပြိုင်ပွဲ၊ ဘောလုံးပွဲများ လက်ခံ ကျင်းပရေး၊ ပြေးခုန်ပစ် ပြိုင်ပွဲများ ကျင်းပရေးနှင့် ဖွင့်ပွဲ ပိတ်ပွဲကျင်းပမည့် ၀ဏ္ဏသိဒ္ဓိ အားကစား ပြိုင်ဝင်းနှင့် ဇေယျာသီရိ အားကစား ပြိုင်ဝင်းတို့သည်လည်း မိတ်ဆွေ နိုင်ငံများက အကူအညီပေးသည့် အားကစား ပြိုင်ဝင်းများ ဖြစ်သည်။
၁၉၅၀ – ၅၁ ခုနှစ်တွင် စတင် ဖွဲ့စည်းခဲ့သည့် အမျိုးသား ကိုယ်လက်ကြံ့ခိုင်ရေး ကောင်စီမှ စကာ လက်ရှိ ပြည်ထောင်စု အားကစားဝန်ကြီး ဌာန အထိ နိုင်ငံတော်က ဆောက်လုပ်ပေးသည့် အားကစား ပြိုင်ဝင်းဟူ၍ မရှိသေးပါ။
အမျိုးသား ကိုယ်လက်ကြံ့ခိုင်ရေး ကောင်စီမှာ ထိုစဉ်က ကျန်းမာရေး ၀န်ကြီးဌာန လက်အောက်မှ အဖွဲ့အစည်းတခု ဖြစ်သည်။ ကျန်းမာရေး အတွက် ခွင့်ပြုသည့် ဘတ်ဂျက်မှာလည်း ဆေးရုံ၊ ဆေးခန်း၊ ဆေးပစ္စည်းနှင့် ကျန်းမာရေး ၀န်ထမ်းများ အတွက်ပင် မလောက်မင ရှိခဲ့ရာ၊ အမျိုးသား ကိုယ်လက်ကြံ့ခိုင်ရေး ကောင်စီအတွက် ငွေလုံး ငွေရင်း ရင်းနှီးလုပ်ကိုင်ခွင့် မရခဲ့ပါ။ ထိုစဉ်က ငွေဈေးနှုန်းအရ မြန်မာ ကျပ်ငွေ သိန်းပေါင်း ရာထောင်ကုန်မည့် အားကစား ပြိုင်ဝင်း တည်ဆောက်ဖို့ မဆိုထားဘိ၊ ကျပ်သိန်း ၃၀ သာ ကုန်ကျမည့် အားကစားရုံ ၁ ရုံ ဆောက်လုပ်ခွင့်ပင် ခွင့်ပြုချက် မရခဲ့ပါ။ ယခု အမျိုးသား အားကစားရုံ ၁ မှာ တရုတ်နိုင်ငံက လှူဒါန်းခြင်း ဖြစ်သည်။ လှိုင်တက္ကသိုလ်ဝင်း အတွင်းရှိ အမျိုးသား အားကစားရုံ ၂ မှာ အမေရိကန်ပြည်ထောင်စု အစိုးရက လှူဒါန်းခြင်း ဖြစ်သည်။
မြန်မာနိုင်ငံနှင့် အားကစား ပြိုင်ဝင်းကြီးများ (၂)
နိုင်ငံတနိုင်ငံ၏ အားကစား အဆင့်အတန်း တိုးတက်ခြင်း ရှိ/မရှိ သုံးသပ် အကဲဖြတ်ကြရာ၌ အားကစား ပြိုင်ပွဲများတွင် ဆုတံဆိပ်များ ဆွတ်ခူးနိုင်ခြင်း ရှိ/မရှိ တမျိုးတည်းကိုသာ ကြည့်ရှု အကဲဖြတ် သုံးသပ်လေ့ မရှိကြပါ။ ဆုတံဆိပ်များ ဆွတ်ခူး နိုင်သည့် အားကစား သမားကောင်းများ မွေးထုတ်ပေးရာ ပြည်တွင်း အားကစား ပြိုင်ပွဲများ၊ အားကစားပြိုင်ပွဲများ ကျင်းပရာ အားကစားရုံ၊ အားကစားပြိုင်ဝင်း၊ စက်ပစ်ကွင်း၊ မြှားပစ်ကွင်း၊ ရေကူးကန်စသည့် အားကစား အထောက်အကူ ပစ္စည်းများ ပြည့်စုံကြွယ်ဝမှု၊ ခေတ်မီ ဆန်းသစ်မှုများနှင့် အတူ အားကစား အထောက်အကူပြု စ္စည်းများကိုပါ ထည့်သွင်း အကဲဖြတ်လေ့ ရှိကြပါသည်။
အမှန်တကယ်တော့ မြန်မာနိုင်ငံတွင် ၂၀၁၃ ခုနှစ်ထဲကျမှသာ နိုင်ငံတကာ အဆင့်မီ အားကစားရုံ၊ အားကစားပြိုင်ဝင်း၊ ရေကူးကန် စသည်တို့နှင့် ပြီးပြည့်စုံခြင်း ဖြစ်ပါသည်။ ယခင်ကမူ အောင်ဆန်း အားကစား ပြိုင်ဝင်း တခုသာလျင် နိုင်ငံတကာအဆင့်ဟု ခေါ်နိုင်သည့် အားကစား ပြိုင်ဝင်းကြီး တခုတည်းသာ မြန်မာနိုင်ငံတွင် ရှိနေသည်ကို အံ့သြဖွယ်ရာ တွေ့မြင်ကြရမည် ဖြစ်ပါသည်။ ယခု အောင်ဆန်း အားကစား ပြိုင်ဝင်းဟု ခေါ်တွငနေသည့် ဘီအေအေ ကွင်း၏ သက်တမ်းမှာ နှစ်ပေါင်း ၁၀၀ ကျော်ခဲ့ပြီ ဖြစ်ပါသည်။ ၁၉၀၀ ပြည့်နှစ် မတိုင်မီက စတင်တည်ဆောက်ခဲ့သည့် အားကစားပြိုင်ဝင်ုးုဖြစ်သည်။ ကမ္ဘာပေါ်တွင် ရှားမည်ဖြစ်သည့် ဘောလုံးကွင်း အမွှာဖြစ်သည်။ ဘောလုံးကွင်း နှစ်ကွင်းတွဲလျက် ရှိနေခြင်းကို ဆိုလိုရင်း ဖြစ်သည်။ ၁၉၆၁ ခုနှစ် ကျွန်းဆွယ် အားကစားပြိုင်ပွဲ မကျင်းပမီ အထိ ဘီအေအေကွင်းထဲ၌ ဘောလုံးကွင်း နှစ်ကွင်းယှဉ်တွဲ ရှိနေခဲ့သည်။ မီတာ ၄၀၀ ပြေးလမ်းကြောင်း ပါရှိသည့်ကွင်းကို ထိုစဉ်က အနီးကွင်း (NEAR) ဟုခေါ်သည်။ ဘောလုံးကွင်းငယ်ချည်း သက်သက်သာ ပါသောကွင်းကို သံဆူးကြိုး သုံး၊ လေးချောင်း သွယ်တန်းပြီး ခွဲခြားထားသည်။ BAA ခေတ်က ပထမတန်း “First Division” ကို အကြီးတန်း “Senior”၊ အငယ်တန်း “Junior” ဟူ၍ အတန်းနှစ်တန်းခွဲပြီး ကျင်းပသည်။ အကြီးတန်းအသင်းက အနီးကွင်းတွင် ကစားကြရသည်။ အငယ်တန်းအသင်းတို့က အဝေးကွင်းတွင် ကစားကြရသည်။
မြန်မာနိုင်ငံတွင် ဒုတိယ အကြိမ်မြောက် အရှေ့တောင်အာရှ ကျွန်းဆွယ် အားကစားပြိုင်ပွဲ ကျင်းပရန် ရှိလာသော အခါကျမှ အောင်ဆန်း အားကစား ပြိုင်ဝင်းကို အသစ်ဆောက်တော့မှ အဝေးကွင်း ပျောက်သွားတော့သည်။ အဝေးကွင်း နေရာတွင် မီးရှုးတိုင်ကြီးနှင့် အတူ လျှပ်စစ်အချက်ပြ ဇယားဘုတ်ကြီး တပ်ဆင်ထားသည့် အရှေ့ဘက်ပွဲကြည့်စင် တည်ဆောက်ခဲ့သည်။
ကျွန်းဆွယ် အားကစားပြိုင်ပွဲ အကြောင်းပြု၍ ဘီအေအေ ကွင်းကောင်းကို ဖြို၍ အောင်ဆန်း အားကစား ပြိုင်ဝင်းအသစ် တည်ဆောက်နိုင်ခဲ့ခြင်း ဖြစ်သည်။ ၁၉၆၁ ခုနှစ် အထိ မြန်မာနိုင်ငံ တွင် အားကစားရုံ “Indoor Stadium” ဟူ၍ သီးသန့် မရှိသေးပါ။ အောင်ဆန်း ပြိုင်ဝင်းအတွင်း အရှေ့တောင်ထောင့်ရှိ မိုးလုံလေလုံ အားကစား ရုံငယ်လေးမှာလည်း ဒုတိယကျွန်းဆွယ် ပွဲကျမှသာ လက်ဝှေ့ပြိုင်ပွဲရုံ အဖြစ် တည်ဆောက်ထားခြင်း ဖြစ်သည်။ အချိန်မီ မပြီးစီးသဖြင့် ကျွန်းဆွယ် လက်ဝှေ့ပွဲများကို နေမြင်၊ လမြင်၊ မိုးမလုံ၊ နေမလုံ ကျင်းပခဲ့ရသည်။
ယင်း အားကစားရုံငယ်လေး မရှိမီက မြန်မာနိုင်ငံသို့ ချစ်ကြည်ရေး လာကစားသည့် တရုတ်ပြည်သူ့ သမ္မတနိုင်ငံမှ ဘက်စကက်ဘော အသင်း သံရုံထဲတွင် ကစားသွားရသည်။ ယခု အောင်ဆန်း အားကစား ပြိုင်ဝင်း အရှေ့မြောက်ထောင့်တွင် သွပ်မိုးသွပ်ကာ အဆောက်အဦတခုကို သတိထားမိသူတိုင်း တွေ့ကြရမည် ဖြစ်သည်။ ယင်းသွပ်မိုး သွပ်ကာရုံကြီးထဲတွင် ကံရာဇာငယ်ထုံး နှလုံးမူကာ ၀ါးလုံးများဖြင့် ပွဲကြည့်စင်လုပ်ကာ ဘက်စကက်ဘောပွဲ ကျင်းပခဲ့ဖူးသည်။
၁၉၆၁ ခုနှစ် မတိုင်မီက မြန်မာနိုင်ငံတွင် နိုင်ငံတကာ အဆင့်ရှိ မီတာ ၅၀ ပါ ရေကူးကန် မရှိခဲ့ပါ။ ဦးဝိစာရလမ်းရှိ အမျိုးသား ရေကူးကန်မှာ ၆၁ ကျွန်းဆွယ်ပြိုင်ပွဲကို အကြောင်းပြု၍ ပေါ်ပေါက်လာရခြင်း ဖြစ်သည်။
ယခုလည်း နေပြည်တော်တွင် ရှိသော နိုင်ငံတကာ အဆင့်မီ ရေကူးကန်မှ လွဲ၍ အခြား မည်သည့် ဒေသတွင်မှ မီတာ ၅၀ ရှည် ရေကူးကန် ရှိမည် မထင်ပါ။ ယခင်ကမူ ရန်ကုန်တက္ကသိုလ် ရေကူးကန် အပါအ၀င် ရေကူးကလပ်များ၏ ရေကူးကန်များ ရှိခဲ့သော်လည်း ၃၃ ဒသမ ၅ မီတာ အရှည်ရှိ ရေကူးကန် ငယ်လေးများသာ ဖြစ်ကြသည်။ မန္တလေး ထွန်းလှဟိုတယ်မှ ရေကူးကန်မှာလည်း အငယ်စားသာဖြစ်သည်။
ဖဆပလ အစိုးရ လက်ထက်တွင် အမျိုးသား ကိုယ်လက် ကြံ့ခိုင်ရေး ကောင်စီက ထိုခေတ် ငွေတန်ဖိုး ကျပ်သိန်း ၃၀ ကျော်၍ မျှော့အိတ်ကွင်း အားကစားရုံ တည်ဆောက်ရေး စီမံကိန်းကို အစိုးရထံ တင်ပြ၍ ခွင့်ပြုချက် တောင်းခဲ့ဖူးသည်။
ယင်း သိန်း ၃၀ ကုန်ကျမည့် အားကစားရုံသစ် ဆောက်လုပ်ရေးနှင့် ပတ်သက်ပြီး ကြုံတွေ့သမျှကို ထိုစဉ်က အမျိုးသား ကိုယ်လက်ကြံ့ခိုင်ရေး ကောင်စီ “National Fitness Council” အတွင်းရေးမှူး အဖြစ် တာဝန် ထမ်းဆောင်ခဲ့သူ မစ္စတာ ပတ်စကင်း ပြုစုသည့် “နှစ် ၆၀ မြန်မာနိုင်ငံ အားကစားသမိုင်း စာအုပ်” ထဲတွင် အောက်ပါအတိုင်း ဖော်ပြခဲ့သည်။ အစီအစဉ်များ ပြုလုပ်ထားပြီး အကောင်အထည် မပေါ်နိုင်သော အဆောက်အဦများ ထဲတွင် ဆိုဗီယက်တို့၏ အားကစား ပြိုင်ဝင်းများသာ မကပါချေ၊ ထိုအစီအစဉ်ထက် နှစ်အနည်းငယ် စောသည့် ကာလကလည်း အမျိုးသား ကိုယ်လက်ကြံ့ခိုင်ရေး ကောင်စီအနေဖြင့် သိန်း ၃၀ ကုန်ကျမည့် ကစားရုံကြီးတခုမှာ အလားတူပင် အကောင်အထည် မပေါ်ဘဲ ပျောက်ကွယ်သွားရရှာသည်။
ကောင်စီ၏ အစီအစဉ်ပါ အိမ်တွင်း အားကစားရုံ တည်ဆောက်ရေး အစီအစဉ်မှာ အစပိုင်းတွင် အတော်ပင် သွက်သွက်လက်လက်နှင့် အဆင်ပြေခဲ့သည်။ အရှေ့အနောက် နိုင်ငံများအထိ အဆောက်အဦပုံစံများ တင်ပြကြရန် တောင်းခံခဲ့သည်။ အဆောက်အဦ ပုံစံ တင်ပြသူ ခုနှစ်ဦး ပေါ်ပေါက်လာသည်။ သူတို့ထဲတွင် နိုင်ငံခြားသား ဗိသုကာ ၅ ဦး ပါဝင်ခဲ့လေသည်။ ကောင်စီအနေဖြင့် နာမည်ကျော် ဗိသုကာ ပညာရှင် ပုဂ္ဂိုလ်ကြီးများ ဖြစ်ကြသည့် ဦးတင်ဦးနှင့် ဦးသာထွန်း နှစ်ဦးအား ပုံစံရွေးချယ်ရာ၌ စေတနာ့ဝန်ထမ်း အကြံပေး ပုဂ္ဂိုလ်များအဖြစ် စီစဉ်ထားခဲ့သည်။ အကြံပေး ပုဂ္ဂိုလ်ကြီးများက တင်သွင်းယှဉ်ပြိုင်သော ပုံစံများကို စိစစ်ပြီးနောက် အစီရင်ခံစာကို တင်သွင်းလိုက်သည်။ ထိုစဉ်က မြန်မာနိုင်ငံသို့ ရောက်ရှိ နေသော အမေရိကန် အဆောက်အဦ ပညာရှင်တဦးကိုလည်း ကောင်စီက မေတ္တာရပ်ခံခဲ့သည်။ ပညာရှင်များ၏ သဘောအရ တင်သွင်းသူများ၏ ပုံစံထဲမှ နိုင်ငံခြားသား ပညာရှင်နှစ်ဦး တင်ပြသော ပုံစံနှစ်ခုကို အနည်းငယ် ပြုပြင်စေပြီး လက်ခံသင့်သည်ဟု ယူဆခဲ့ကြသည်။
သို့ရာတွင် ကောင်စီလူကြီးများ အနေဖြင့် ထိုတင်ပြချက်တွင် ထင်မြင်ချက်များ ကွဲပြားလျက် ရှိခဲ့သည်။ အချို့သော ကောင်စီလူကြီးများက မြန်မာပညာရှင်တဦး၊ နှစ်ဦးတို့၏ ပုံစံများကိုသာ လက်ခံလိုကြသည်။ ဤသို့နှင့် အိမ်ကွင်း ကစားရုံ တည်ဆောက်ရေး လုပ်ငန်းမှာ အကောင်အထည် ပေါ်မလာတော့ဘဲ ပျောက်ခြင်းမလှ ပျောက်ကွယ်သွား ရတော့သည်။ ဤကား မြန်မာနိုင်ငံတွင် ကိုယ်ပိုင်အားကစားရုံ မရှိရသည့် အကြောင်းရင်းပင် ဖြစ်သည်။
လက်ရှိ ရှိနေသော အမျိုးသား အားကစားရုံသစ်မှာ တရုတ်ပြည်သူ့ သမ္မတနိုင်ငံက ဆောက်လုပ် လှူဒါန်းသည့် အားကစားရုံ ဖြစ်သည်။ အမျိုးသား အားကစားရုံ ၂ ရုံမှာ အမေရိကန်ပြည်ထောင်စုက ဆောက်လုပ် လှူဒါန်းခြင်း ဖြစ်သည်။
သို့ဖြစ်ရာ ယခင်က ရန်ကုန် နေပြည်တော်မှာပင် အားကစားရုံ၊ အားကစားပြိုင်ဝင်းများ မပြည့်မစုံ မလုံလောက်ဘဲ ရှိနေရာ နိုင်ငံနှင့်အ၀ှမ်းဆိုလျင် ပြောဖွယ်ရာ မရှိတော့ပါ။
အမျိုးသား ကိုယ်လက်ကြံ့ခိုင်ရေး ကောင်စီ လက်ထက်က မြန်မာ တပြည်လုံးတွင် အားကစား ပြိုင်ဝင်းများ ပြည့်စုံ လုံလောက်ရေး စီမံကိန်းတရပ် ချမှတ်ဆောင်ရွက် ခဲ့ဖူးသည်။ ယင်းစီမံကိန်းမှာ ခရိုင်မြို့ကြီးများတွင် မီတာ ၄၀၀ ပြေး လမ်းကြောင်းပါ ဘောလုံးကွင်း တည်ဆောက်ရေး အတွက် ခရိုင်ဝန် ရုံးစိုက်ရာ ခရိုင်မြို့ကြီးများကို မတည်ငွေ ကျပ် ၅၀၀၀၀ ထုတ်ပေးခြင်း ဖြစ်သည်။
ယင်း စီမံကိန်းမှာ အထိုက်အလျောက် အောင်မြင်ခဲ့သည်။ ခရိုင်မြို့ကြီး အချို့တွင် ယနေ့တိုင် အားကစားကွင်းကြီးများ ရှင်သန်လျက် ရှိသည်။ အချို့မှာမူ ပျောက်ကွယ်ကုန်ကြသည်။ နိုင်ငံတော်က အားကစားကို အလေးထား အားပေးနေသည့် ကာလတွင် ပြည်နယ်နှင့် တိုင်းဒေသကြီး အစိုးရ အဖွဲ့များ ရုံးစိုက်သည့် မြို့ကြီးများတွင် အားကစား ပြိုင်ဝင်းတခု၊ အားကစားရုံ တရုံလောက်တော့ ရှိသင့်ပါသည်။ ၀ဏ္ဏသိဒ္ဓိ ပြိုင်ဝင်းလို ဇေယျာသီရိ အားကစား ခန်းမလို အဆင့်အတန်းမျိုးကို မဆိုလိုပါ။ ကိုယ့်ဒေသ ကိုယ့်အရပ်နှင့် လိုက်လျောညီထွေ ရှိသင့်ရှိထိုက်သော အားကစားရုံ၊ အားကစားကွင်းများကို ဆိုလိုရင်း ဖြစ်ပါသည်။
အားကစားရုံ၊ အားကစားကွင်းများ မရှိဘဲနှင့် အားကစားပြိုင်ပွဲများ မရှိနိုင်ပါ။ အားကစားပွဲ မရှိဘဲနှင့် အားကစားသမား မရှိနိုင်ပါ။ အားကစားသမား မရှိဘဲနှင့် လက်ရွေးစင် ကစားသမားများ ပေါ်ထွက်မလာနိုင်ပါ။ လက်ရွေးစင် ကစားသမားကောင်းများ မရှိပါဘဲနှင့် နိုင်ငံ့ဂုဏ်ဆောင် အားကစားသမားများ ပေါ်ထွက်လာမည် မဟုတ်ပါ။ ထို့အတူ နိုင်ငံတကာ အားကစား ပြိုင်ပွဲများတွင် အောင်ပန်း ဆွတ်ခူးရန် ကြန့်ကြာ နေပါလိမ့်မည်။ ခက်ခဲနေပါလိမ့်မည်။ ဖြစ်နိုင်ပါက တတ်နိုင်လျင် မူလတန်းကျောင်းငယ်များ၊ ကောလိပ် တက္ကသိုလ်နှင့် သိပ္ပံကျောင်းများတွင်လည်း ထိုက်သင့်သည့် သင့်လျှော်သည့် အားကစားရုံများ၊ ကစားကွင်းများရှိဖို့ အမှန်တကယ် လိုအပ်နေပါပြီ။ ကျောင်းသူ / ကျောင်းသား အားလုံး၏ အကျင့်စာရိတ္တ ကောင်းမွန်ရေးကို အားကစားကလည်း အထောက်အကူ ပြုနိုင်ပါသည်။ စမ်းသပ်ကြည့်ကြစေလိုပါသည်။
မြန်မာနိုင်ငံနှင့် အားကစား ပြိုင်ဝင်းကြီးများ (၃)
AFF Women’s AYA Bank Championship 2013 (Semi Final) ပွဲ မြန်မာအမျိုးသမီးအသင်းနှင့် သြစတေးလျ အမျိုးသမီးအသင်း တို့ စက်တင်ဘာ ၂၀ရက်နေ့က အောင်ဆန်းကွင်းတွင် ယှဉ်ပြိုင်နေစဉ် (ဓာတ်ပုံ – ဂျေပိုင် / ဧရာဝတီ)
FIFA သို့မဟုတ် AFC က Pro ကလပ်အသင်းတိုင်းတွင် ကိုယ်ပိုင် ဘောလုံးကွင်း ရှိကြရမည်။ အနည်းဆုံး ပါဝင်တဲ့ ကလပ်အသင်း တ၀က်လောက်က ကိုယ်ပိုင်ကွင်း ရှိကိုရှိရမည် ဟု ဆိုထားသဖြင့် ရန်ကုန်တွင် အောင်ဆန်းကွင်းနှင့် သုဝဏ္ဏ၊ မန္တလေးတွင် ဗထူးနှင့် တောင်ကြီး ဘောလုံးကွင်းတို့ကို ဦးစွာပထမ Pro ကစားကွင်းများ အဖြစ် ငှားရမ်း အသုံးချခဲ့ ကြရသည်။ အားကစား ၀န်ကြီးဌာနပိုင် ဘောလုံးကွင်းများကို ငှားရမ်းခဲ့ကြရခြင်း ဖြစ်သည်။ ယင်းနောက်တွင် ဇေယျာရွှေမြေ အသင်းက မုံရွာ အားကစားကွင်းနှင့် နေပြည်တော် အသင်းက ပျဉ်းမနား ပေါင်းလောင်းကွင်း၊ ရန်ကုန် ကလပ်အသင်းက လှိုင်ကွင်းတို့ကို ငှားရမ်းပြီး အိမ်ကွင်းများ အဖြစ် သတ်မှတ် အသုံးပြုခဲ့ ကြသည်။
ကျန် ကလပ်အသင်းများကလည်း ကိုယ်ပိုင် ဘောလုံးကွင်းများ ရရှိရန် ကြိုးပမ်းကြသော်လည်း ယခု အချိန်အထိ အမျိုးသား ကိုယ်လက်ကြံ့ခိုင်ရေး ကောင်စီ လက်ထက်မှ ခရိုင်မြို့ကြီးတမြို့တွင် မီတာ ၄၀၀ ပြေးလမ်းကြောင်းပါ ဘောလုံးကွင်းများ တည်ဆောက်ရေး တခရိုင်လျှင် ကျပ်ငွေ ၅၀၀၀၀ စီ မတည်ငွေပေး၍ ဖောက်လုပ်ခဲ့ ကြသည့် ဘောလုံးကွင်း အချို့မှာ ယခုအခါတွင် ပြုပြင်ထိန်းသိမ်းမှု ကင်းမဲ့ပြီး ဖုန်းဆိုးတောကြီးများ ဖြစ်နေကြသည်။ အားကစား ပြိုင်ဝင်း တ၀င်းတွင် ရှိသင့်ရှိထိုက်သော ပွဲကြည့်စင်များ၊ ဘောလုံးအသင်းများ နားနေခန်းများ မဆိုထားဘိ၊ ဘောလုံးကွင်း မြက်ရှင်းပြုပြင်စရိတ်ပင် သိန်းရာကျော် ကုန်ကျဖွယ်ရှိသည်။ ကြေးစား ကလပ်အသင်း ဖွဲ့စည်းထူထောင်ဖို့ သိန်းပေါင်း ထောင်ချီကုန်ကျနေပေရာ နောက်ထပ် သိန်းရာထောင် အကုန်အကျခံရန် ၀န်လေးနေသည့် အနေအထားပင် ဖြစ်သည်။
အင်္ဂလိပ် နယ်ချဲ့သမားတို့ မြန်မာပြည်ကို သိမ်းပိုက်ပြီးနောက် ခေတ်သစ်ဘောလုံး ကစားနည်းကို မြန်မာနိုင်ငံကွင်းသို့ တင်သွင်းလာသည်မှာ အားလုံး အသိပင် ဖြစ်ပါသည်။ သို့ရာတွင် ဘောလုံးကစားရန် ကွင်းများကိုမူ တည်ဆောက်ခြင်း မရှိပါ။ ရှေးခေတ်က ဘောလုံးပွဲများကို ရန်ကုန်တွင် ကစားခဲ့ကြရာ ယခင်မြို့မကျောင်း (အထက ၂ ဒဂုံ) ရှေ့ရှိ မြင်းပြိုင်ကွင်းတွင် မြင်းပွဲ မရှိသည့် နေ့များတွင်သာ ကျင်းပနိုင်ခဲ့သည်။
၁၉၀၀ ပြည့်နှစ် ရောက်မှ ယခု ရန်ကုန်ဘူတာကြီး အနီးရှိ ရေအိုင်ကြီးကို မြေဖို့ကာ ဘောလုံးကွင်း အသစ်ကို ထိုစဉ်က ဘောလုံး ၀ါသနာရှင်များက ရန်ကုန်မြူနီစပယ်အဖွဲ့ အကူအညီဖြင့် ဆောက်လုပ်ခဲ့ကြခြင်း ဖြစ်သည်။ ဤသို့ဖြင့် BAA အမည်ရှိ ဘောလုံးကွင်း တကွင်း ပေါ်လာခြင်း ဖြစ်သည်။ ထိုနည်းတူစွာ မန္တလေးမှ ဘောလုံး ၀ါသနာရှင်များ၏ ကြိုးပမ်းမှု ကြောင့် ဘောလုံးကွင်း တကွင်း တည်ဆောက်ခဲ့ ကြသည်။ ဘောလုံးကွင်း အမည်မှာ UBAA ကွင်း ဟူသတည်း။ အခြားသော ခရိုင်မြို့ကြီး အချို့တွင်လည်း ဘောလုံးကွင်းများ ရှိကောင်း ရှိပါလိမ့်မည်။ အင်္ဂလိပ်ခေတ်က ရန်ကုန် BAA ကွင်းမှလွဲ၍ ထင်ရှားသော ဘောလုံးကွင်း နှစ်ကွင်း ရှိသည်။ တကွင်းမှာ ပျဉ်းမနား သစ်တောကျောင်း ဘောလုံးကွင်း ဖြစ်သည်။ စစ်မဖြစ်ခင်က သစ်တောအရာထမ်း၊ ၀န်ထမ်းများ အတွက် သစ်တောကျောင်း ဟူ၍ ရှိခဲ့ဖူးသည်။ သစ်တောကျောင်းအုပ်ကြီးမှာ အင်္ဂလိပ်လူမျိုး မစ္စတာ အယ်ဂျလီ ဆိုသူဖြစ်သည်။ သူကိုယ်တိုင်က ထူးချွန်သည့် ဘောလုံးသမားတဦး ဖြစ်သည်။ အထက်မြန်မာပြည် လက်ရွေးစင်အထိ ထူးချွန်ခဲ့သည်။
သူ ကျောင်းအုပ် လုပ်နေသည့် သစ်တောကျောင်းတွင် ဘောလုံးကွင်း တည်ဆောက်ခဲ့သည်။ နွေရာသီတွင် ဘောလုံးကွင်း အတွင်းမှ မြက်ပင်များ ခြောက်သွေ့ မသွားစေရန် ဖျာကြမ်းများဖြင့် အုပ်မိုးထားသည် ဟု ကြားသိရသည်။ ဆောင်းတွင်းနှင့် မိုးအခါတွင် ဘောလုံးကွင်းကို ရွှေလို ဥထားသည်။ ဘောလုံးပွဲ မရှိလျင် ဘောလုံးကွင်း အတွင်းသို့ မည်သူမျှ ခြေမချရ ဟုလည်း ကြားသိရဖူးသည်။ မစ္စတာ အယ်ဂျလီလိုပင် ဘောလုံးကွင်းကို အရိပ်တကြည့်ကြည့်ဖြင့် ရွှေလိုဥထားသည့် ပုဂ္ဂိုလ်တဦး ဒီဘက်ခေတ်တွင် တွေ့ဖူး ကြုံဖူးသည်။ ယင်း ပုဂ္ဂိုလ်ကြီးမှာ ကွယ်လွန်သူ မြန်မာ့လက်ရွေးစင် ဘောသမားဟောင်း၊ အားကစားနှင့် ကာယပညာဦးစီးဌာန ညွှန်ကြားရေးမှူးချုပ် ဗိုလ်မှူးကြီး ကွတ်ရှိန် ဖြစ်သည်။
စစ်မဖြစ်ခင်က ပျဉ်းမနားသစ်တောကျောင်း ဘောလုံးကွင်းနီးတူ ထင်ရှားသည့် ဘောလုံးကွင်းမှာ ချောက် ရေနံမြေဘောလုံးကွင်း ဖြစ်သည်။ စစ်ပြီးခေတ်ကျမှ ချောက်ဘောလုံးကွင်းကို ကြုံတွေ့ဖူးသည်။ မြို့အလယ်တွင် ဖြစ်သဖြင့် မြင့်မားသော သံဇကာများဖြင့် ကာရံထားသည်။ ဘောလုံးကွင်းထဲရှိ မြက်များမှာ အညာဒေသနှင့်မတူဘဲ စိမ်းလန်းစိုနေသည်။ ချောက်ရေနံမြေ ဘောလုံးကွင်းများကို စနစ်တကျ ထိန်းသိမ်းစောင့်ရှောက် ထားသည်ဟုလည်း ကြားသိခဲ့ရသည်။
အင်္ဂလိပ်ခေတ်တွင် အင်္ဂလိပ်တို့က ဘောလုံးကစားနည်းကို တင်သွင်းသော်လည်း အင်္ဂလိပ်အစိုးရက တည်ဆောက်ပေးခဲ့သည့် ဘောလုံးကွင်း တကွင်းမှ မြန်မာနိုင်ငံတွင် မရှိခဲ့သည်ကတော့ အမှန်ပင်ဖြစ်သည်။ ထိုနည်းတူစွာပင် လွတ်လပ်ရေး ရရှိသည့် ၁၉၄၈ ခုနှစ်မှ စကာ ၂၀၁၀/၁၁ ခုနှစ်အထိ အစိုးရ အဆက်ဆက်က ဘောလုံးအားကစားပြိုင်ဝင်း တည်ဆောက်ပေးခဲ့ခြင်း မရှိပါ။
၁၉၆၁ ခုနှစ်တွင် ဒုတိယအကြိမ်မြောက် အရှေ့တောင်အာရှ ကျွန်းဆွယ်အားကစားပြိုင်ပွဲ ကျင်းပရန်အတွက် အောင်ဆန်းကွင်းနှင့် အဆောက်အဦ များကို စတင်၍ အသစ်မွမ်းမံခဲ့သည်။ မြန်မာနိုင်ငံမှာ ၅ ကြိမ်မြောက် အရှေ့တောင်အာရှ ကျွန်းဆွယ် ပြိုင်ပွဲကို ၁၉၆၁ ခုနှစ်တွင် ကျင်းပရန် အတွက် အောင်ဆန်းအားကစား ပြိုင်ဝင်းကို ထပ်မံမွမ်းမံခဲ့သည်။ ဘောလုံးကွင်း အချို့ကို လက်ရှိ မြန်မာနိုင်ငံ ဘောလုံးအဖွဲ့ချုပ်က အားကစား ၀န်ကြီးဌာနမှ နှစ်ရှည်ငှားရမ်းခဲ့ပြီးနောက် အောင်ဆန်း အားကစားပြိုင်ဝင်း နိုင်ငံတကာအဆင့်မီကွင်း အဖြစ် ပြုပြင်နိုင်ခဲ့သည်။
အမျိုးသား ကိုယ်လက်ကြံ့ခိုင်ရေး ကောင်စီလက်ထက်တွင် စလင်းဘောလုံးကွင်းနှင့် ပြည်တော်သာ ဘောလုံးကွင်းငယ်များသာ ရန်ကုန်တွင် တည်ဆောက်နိုင်ခဲ့သည်။ ပြည်တော်သာ ဘောလုံးကွင်းကို ကလေးဆေးရုံကြီး တိုးချဲ့ရာတွင် ထည့်သွင်းပြီး ပြည်တော်သာ ဘောလုံးကွင်းပေါ်တွင် ကလေးဆေးရုံ တိုးချဲ့ဆောက်လုပ်ခဲ့သည်။ ပြည်တော်သာကွင်း ပျောက်ကာ ကလေးဆေးရုံ ရောက်ခဲ့သည်။ အားကစားနှင့် ကာယပညာ ဦးစီးဌာန လက်ထက်တွင် ပဒေသာ ဘောလုံးကွင်း ငယ်တကွင်း ဖောက်လုပ် နိုင်ခဲ့သည်။
ယင်းနောက်တွင်မူ ဂျပန်အစိုးရက လူငယ်လေ့ကျင့်ရေး စခန်းအမည်ဖြင့် မီတာ ၄၀၀ ပြေးကွင်းပါ ဘောလုံးကွင်းနှင့် ပွဲကြည့်စင်များကို ဆောက်လုပ် လှူဒါန်းခဲ့သည်။ ယခုအခါ သုဝဏ္ဏကွင်းဟု လူသိများနေသည့် ဘောလုံးကွင်းပင်ဖြစ်သည်။ ၂၇ ကြိမ်မြောက် အရှေ့တောင် အာရှ အားကစားပွဲ ကျင်းပနိုင်ရေး အတွက် နေပြည်တော်တွင် အားကစားပြိုင်ဝင်းကြီး နှစ်ခုရှိသည်။ နိုင်ငံတကာ အားကစားပြိုင်ဝင်းများ ဖြစ်သည်။
သို့ရာတွင် ယခင်ကရှိခဲ့ဖူးသော ဘောလုံးကွင်းများ (၀ါ) ကလေး ကစားကွင်းများလည်း တဖြည်းဖြည်း ပျောက်ကွယ်ကုန်သည်။ မန္တလေး မလွန်ကွင်းမှာ ဗထူးကွင်းပြီးလျှင် မန္တလေးတွင် လူသိများသည့် ဘောလုံးကွင်း တကွင်းဖြစ်သည်။ ယခုအခါ ပျောက်ကွယ်သွားသည်။ ပျဉ်းမနား မြူနီစပယ် ဘောလုံးကွင်းမှာ အင်္ဂလိပ်ခေတ် ကတည်းမှ ရှိခဲ့သည့် ဘောလုံးကွင်း ဖြစ်သည်။ ရှေးခေတ် မြန်မာ့လက်ရွေးစင် ချန်စိန်ကို မွေးထုတ်ပေးခဲ့သည့် ဘောလုံးကွင်း ဖြစ်သည်။ ယခု ဘောလုံးကွင်း မဟုတ်တော့ပါ။ ရန်ကုန်တွင် တာမွေရာပြည့်ကွင်း၊ တောင်ဥက္ကလာ အပန်းပြေကွင်းတို့ ပျောက်မသွားရေး အတွက် တိုက်ပွဲဝင်နေကြ ရသည်။ အညာတွင် လမ်းသစ်ဖောက်လုပ်ရာ၌ ဘောလုံးကွင်းထဲ ဖြတ်ဖောက်သည်ဟု ကြားခဲ့ရဖူးသည်။
ဘောလုံးကွင်းမရှိဘဲ ဘောလုံးပွဲများ မကျင်းပနိုင်ပါ။
ဘောလုံးပွဲမရှိလျှင် ဘောလုံး ကစားသမားကောင်းများ မထွက်နိုင်ပါ။
ဘောလုံးသမားကောင်းမရှိဘဲနှင့် လက်ရွေးစင် ဘောလုံးအသင်း မရှိနိုင်ပါ။
အားလုံးစဉ်းစားကြရန်ဖြစ်သည်။
No comments:
Post a Comment